羅尚沛：黃金周變黃金粥
---新朋友請點上方 ”港股策略王” 關注我們---
時間是某年的十一黃金周，地點是首都北京，人物是小弟和幾個第一次去北京的朋友。原本一班人放假懷著輕鬆愉快的心情暢遊我國最偉大的首都城市，踏足去完會變真漢子的萬里長城，在莊嚴的天壇來個freestyle，在人民大會堂門外selfie，點知最後所有景點都只能遠觀。斯斯文文冇運行，粗粗魯魯食大餐。
去到長城八達嶺，你係唔會相信自己對眼可以一次過見到咁多個人，迫下迫下總算迫到入去，親身體驗了何謂「上坡看屁股，下坡看腦袋」的奇景。周圍都係你聽唔明又好似鬧緊你阻住晒的地方方言，幾十個導遊喇叭不斷廣播唔係介紹景點，而係尋人啟事，「小芬叫小強馬上去公廁門口等，因為小李個仔小小李唔知走咗去邊」。
最慘係旁邊有個小朋友，佢係咁流鼻血，但礙於前後左右都係人，而那些人又唔肯讓出小小空間驚死蝕底，那位小朋友連彎低腰嘅空間都冇，只能企直讓鼻血流，一邊哭一邊滴血，好有長城好漢feel。
去到天壇，本身個地方係超大的，但一樣係人山人海，如果你覺得香港年宵市場叫多人的話，唔係呃你，當日每平方米個密度肯定是多一倍。想影相，sorry，鏡頭前面一定會有人行過，有人妙想天開地set腳架影集體相，小弟反為建議買張天壇postcard然後key返個樣「到此一遊」算吧啦，唔駛嗌破喉嚨叫唔該借借。
話說最後一天去故宮，多人唔在講，那種摩肩接踵，配合30幾度高溫嘅環境，真係前面有堆還珠格格都唔會有胃口。最有黃金周去旅行feel嘅就係故宮門口大量的「黑的」，即係載你去唔知乜乜崇禎皇帝自殺個山，然後收入場費回佣的司機，都竟然大排長龍個個甘願被劏，無非是因為主要景點簡直係步履維艱，寧願去個劏客黑點都好過冇。
去年旅遊局話要取締有啲景點以乜乜皇帝好似摸過嗰茶至石作招徠，就收幾百入場費。其實佢哋知唔知啲旅客係甘願被劏，皆因只想找個清靜地方歇一歇而矣。
咁又話說小弟每次去北京都會去一間食鴨的地方，那次有友相伴當然帶佢哋食好嘢。點知平時唔駛等位的要等兩個鐘，人多都冇辦法，最慘係我哋呢啲港燦食嘢就住就住，同胞就唔貴唔叫，大排筵席，老闆自不然面露不悅。慘，成餐飯我哋好似同佢乞食咁，反為旁邊粗粗魯魯冇manner的大款同胞就帝皇式享受。
自此之後，逢黃金周小弟都會留港消費，冇錢就唔好同人迫。據估計，今年黃金周加中秋8日長假，全中國吃、住、行、遊、購、娛，消費力足足有5900億元，當中佔不了小弟的1元。
=================================
揭頁版電子書同步上架，即刻Click 入以下網址收看
http://subscription.winmoney.hk/
=================================
《港股策略王》手機APP
iOS：http://appsto.re/hk/ysXocb.i
Android：http://play.google.com/store/apps/details?id=com.megahub.winmoney
#港股策略王 #手機app #更新#你今日下載咗未
掃一掃QRCode (二維碼)馬上關注"港股策略王"
