小炒王：不問價追浙江世寶 ---新朋友請點上方 ”港股策略王” 關

---新朋友請點上方 ”港股策略王” 關注我們---

【不問價追】不問價追浙江世寶（小炒王梁心欣）（第148期）

由於在一個半月內成為「倍升股」，好多人都問小炒王有無下隻信邦（01571.HK），其實小炒王早幾日睇緊一隻，最新仲出埋首三季業績，就確認到下隻心水倍升股了，佢就係浙江世寶（01057.HK）。

早幾年熱炒AH股時，成日叫佢「浙江細佬」，好記得當年同啲戰友溝通時，講細佬又升幾個，諗返個情況真係幾好笑。公司早前出咗通告講與戴姆勒股份有限公司（Daimler AG）（「戴姆勒」）簽署了轉向器全球採購協議，標誌著戴姆勒載重車轉向器供應商資格正式落戶浙江世寶身上。而最新出嘅業績，每股收益第三季同比大跌88%，首九個月同比跌19.19%，小炒王心諗呢隻掂晒，正係我想搵嘅股份。

大跌88%咁都話掂？大家肯定諗：「小炒王係咪short咗？」如果係一隻處於高位嘅牛股，見到份業績肯定會好大落差，因為業績見頂。但喺細佬身上，反而呢份以及全年業績，好大機會跌出個底來！絕對係好好嘅收貨機會，博2018、19年大翻身，turn around後股價梗係望倍升啦！

早幾年前，炒細佬嘅時候，純粹就係為AH差價，純炒呢個因素，現時AH股仲未喺風口，反而畀咗個機會大家低位上車。公司發出Daimler份通告之後，我簡單研究咗一陣，發現細佬大個咗唔少，盤生意愈來愈實在，仲好有潛力，絕對係未來浙江之星。

浙江世寶係中國優秀零部份供應商百強，而經戴姆勒多年指導，派晒專家過來驗證，浙江世寶嘅轉向器終於成功進入咗戴姆勒的產品試驗、認證同埋PPAP 審核，係今年10月，正式向戴姆勒供貨。講戴姆勒可能唔係人人都識，講BENZ大家一定識，唔講大家可能唔知，以銷量計，戴姆勒車廠係全球第二大卡車製造商。浙江世寶泊到大碼頭，梗係值得高興，但係可喜可賀嘅係細佬做到人哋嘅交貨標準！呢個係絕對唔容易的事，未來跟大佬搵食，小炒王相信公司有望更上一層樓，趁現時股價仲係低位，慢慢建倉。

若果有留意公司網頁，就會發現到公司年底仲有一個新產品量產，就係與上海智駕汽車科技有限公司（Maxieye）係商用車智能轉向系統上深度合作，簡單講就係公司年底前應有「自動駕駛」產品要面世。

講起自動駕駛，主要就要靠先進駕駛輔助系統（ADAS），而ADAS系統是藉由結合感測器、雷達/光達（Lidar）與機器視覺技術實現的盲點偵測、夜視輔助、停車輔助、主動車距控制巡航（定速）、碰撞警示、偏離車道警示、緊急剎車等等功能，主要目的為強化行車安全並降低事故發生率，早前小炒王推介的昂納科技（00877.HK）自動駕駛個部分係講緊光達（LIDAR）。

ADAS龍頭大哥INTEL早前用咗153億美元收購MOBILEYES，咁MAXIEYE個名咁似嘅？係咪山寨？睇返資料，又真係幾猛料，創辦人周聖硯08年在MIT（麻省理工）讀研究生，他的導師和 Mobileye 的創始人Amnon Shashua在同一實驗室。而周聖硯也透露曾在某主機廠內部一間公司工作，「從0到1」完成了一個有關ADAS的項目，參與了從算法到產品的全部研發工作。而MaxiEye的簡介是「MIT核心團隊」，創始團隊成員有5個來自MIT。今年6月已經完成咗PRE-A輪融資，而年底推出高速公路L3級別自動駕駛系統，即係好大機會係同浙江世寶嘅戰略合作產品，小炒王相信浙江世寶有埋自動駕駛概念，未來股價隨時落鑊大炒。

睇返公司股價，自AH股熱情不再，公司股價回歸平淡，52周波幅係$2.46- 5.22，現價$3.2水平係偏向52周低位附近，小炒王覺得股價回落反而係低吸良機。大家都知浙江系啲股票好炒得，有隻叫細佬嘅話，梗係有隻叫大佬，浙江大佬相信唔駛講都知，佢係升咗好幾倍仲入埋藍籌的吉利（00175.HK），所以小炒王特別期待細佬未來可以乘風破浪，今日不問價追浙江世寶（01057.HK），中長線目標價一倍以上。

=================================

揭頁版電子書同步上架，即刻Click 入以下網址收看

http://subscription.winmoney.hk/

=================================

《港股策略王》手機APP

iOS：http://appsto.re/hk/ysXocb.i

Android：http://play.google.com/store/apps/details?id=com.megahub.winmoney

#港股策略王 #手機app #更新#你今日下載咗未

掃一掃QRCode(二維碼)馬上關注"港股策略王"